რუსეთის პრეზიდენტ ვლადიმერ პუტინსა და აშშ-ს პრეზიდენტ ჯო ბაიდენს შორის სატელეფონო საუბარი არ გაიმართება. ამის შესახებ ინფორმაციას რუსეთის საგარეო საქმეთა სამინისტრო ავრცელებს.
მათივე ცნობით შეერთებულმა შტატებმა შეთავაზებაზე უარი თქვა.
„აშშ-მ ხელიდან გაუშვა კიდევ ერთი შესაძლებლობა, გამოსავალი მოეძებნა იმ ჩიხიდან, რომელიც რუსეთ-ამერიკის ურთიერთობებში ვაშინგტონის გამო შეიქმნა. ამაზე პასუხისმგებლობა მთლიანად ეკისრება შეერთებულ შტატებს“,- ნათქვამია რუსეთის საგარეო უწყების ვებ-გვერდზე გამოქვეყნებულ განცხადებაში.
ცნობისთვის, პუტინმა ბაიდენს სატელეფონო საუბრის გამართვა მას შემდეგ შესთავაზა, რაც ჯო ბაიდენმა პუტინს მკვლელი უწოდა. ამ განცხადების გამო რუსეთში ბაიდენისგან ბოდიშს ითხოვენ და ვაშინგტონიდან ელჩი გამოიწვიეს.
