UFC-ის ისტორიაში პირველმა ქართველმა ჩემპიონმა, ილია თოფურიამ ქვემსუბუქი წონის ტიტულის მოგებიდან თითქმის ერთი წლის თავზე ქამარზე უარი თქვა და ვაკანტური გახადა.
ინფორმაცია დაადასტურა UFC-ის პრეზიდენტმა დანა უაითმა, რომელმაც Instagram-ზე ლაივ ჩართვისას განაცხადა, რომ ქართველი 66 კილოგრამ წონით კატეგორიას სამუდამოდ დაემშვიდობა და ამიერიდან 70 კილოგრამში იასპარეზებს. უაითის განცხადებით, ცვლილების მიზეზი გართულებული წონის კლებაა და მომდევნო ბრძოლას უკვე 70 კილოგრამიანი მებრძოლის წინააღმდეგ გამართავს.
ამ ეტაპზე ილიას სავარაუდო მეტოქის შესახებ ცნობილი არ არის, თუმცა თავად მსუბუქი წონის ჩემპიონის ისლამ მახაჩევის წინააღმდეგ ბრძოლის სურვილი არაერთხელ დაუფიქსირებია.
ქვემსუბუქი წონის ქამრის ახალი მფლობელი 13 აპრილს UFC 314-ზე, მაიამიში ჩასატარებელ ღონისძიებაზე ყოფილი ჩემპიონის ალექსანდერ ვოლკანოვსკისა და დიეგო ლოპესს შორის ჩასატარებელ ბრძოლაში გაირკვევა.
დანა უაითის განცხადებით, ილია თოფურია ქვემსუბუქი წონის ჩემპიონის წოდებას სწორედ აღნიშნულ ბრძოლამდე შეინარჩუნებს.
შეგახსენებთ, რომ ილია თოფურიამ საჩემპიონო ქამარი UFC 298-ზე ალექსანდერ ვოლკანოვსკის წინააღმდეგ ნოკაუტით მოიპოვა, ხოლო მოგვიანებით UFC 308-ზე მაქს ჰოლოუეის გათიშვით ერთხელ დაიცვა.
