საქართველოს ბანკის მენეჯმენტში ცვლილებებია - ამის შესახებ საქართველოს ბანკის ჯგუფმა ლონდონის საფონდო ბირჟაზე გამოქვეყნებულ განცხადებაში აღნიშნა.
ცვლილებები საქართველოს ბანკის მენეჯმენტში:
გენერალური დირექტორის მოადგილედ დაინიშნა მთავარი იურიდიული ოფიცერი ანა კოსტავა, რომელიც ექვემდებარება მარეგულირებელი ორგანოს დამტკიცებას. ანა საქართველოს ბანკს 2018 წელს შეუერთდა და გარდა ჯგუფის ძლიერი სამართლებრივი და შესაბამისობის ფუნქციის აშენებისა, მან მნიშვნელოვანი როლი ითამაშა ჯგუფის ყველა ძირითად სტრატეგიულ ტრანზაქციაში ბოლო ორი წლის განმავლობაში, მათ შორის ჯგუფის მიერ სომხეთში გაფართოების პროცესში.
ლევან გომშიაშვილი, რომელიც მარკეტინგის, ციფრული მიმართულებისა და მომხმარებელთა გამოცდილების ხელმძღვანელია, დაინიშნა გენერალური დირექტორის მოადგილედ, ცვლილება ექვემდებარება მარეგულირებელი ორგანოს თანხმობას. ლევან გომშიაშვილი ბანკში 2019 წლიდან მუშაობს და მისი ხელმძღვანელობით ბანკმა მომხმარებელთა ნდობის და კმაყოფილების მაღალ დონეს მიაღწია. მან ასევე მნიშვნელოვანი წვლილი შეიტანა ბანკის ციფრული განვითარების მიმართულებით, რაც განაპირობა საქართველოს ბანკის აღიარებამ Global Finance-ის მიერ 2024 წელს, როგორც „მსოფლიოში საუკეთესო ციფრული ბანკი“.
ნუციკო გოგილაშვილი, რომელიც ამჟამად საცალო საბანკო მომსახურების მიმართულებით გენერალური დირექტორის მოადგილეა, დაიკავებს პოზიციას ლონდონში და საქმიანობას გააგრძელებს ჯგუფში, როგორც უფროსი საერთაშორისო ბიზნესმრჩეველი კომპანიის ლონდონის ოფისში. მის პოზიციას 2025 წლის 1 მარტიდან დაიკავებს გიორგი გურეშიძე, რომელიც ამჟამად საოპერაციო მიმართულების დირექტორია. გიორგი ბანკს 2023 წლის სექტემბერში შეუერთდა და მოკლე დროში მნიშვნელოვანი შედეგები აჩვენა. გიორგი გურეშიძეს მოადგილე, ზურაბ ალფაიძე, რომელიც ბანკს 2024 წლის დასაწყისში შეუერთდა გახდება ბანკის საოპერაციო მიმართულების დირექტორი.
საქართველოს ბანკის აღმასრულებელმა დირექტორმა, არჩილ გაჩეჩილაძემ, აღნიშნა:
„დღეს ვაცხადებთ რამდენიმე დანიშვნის შესახებ, რაც გუნდის წევრების მტკიცე მუშაობისა და ორგანიზაციის წარმატებაში მათი წვლილის შედეგია. მჯერა ჩვენი ლიდერების შესაძლებლობების და მინდა ყველას წარმატებები ვუსურვო."- ნათქვამია გამოქვეყნებულ ინფორმაციაში.
