თბილისის მერია ლაგუნა ვერეს მიმდებარე ტერიტორიაზე მდებარე ბენზინგასამართ სადგურებს აიღებს. როგორც თბილისის მერმა მთავრობის სხდომაზე განაცხადა, საკითხი გადასაწყვეტად საკრებულოს გადაეგზავნება.
კახა კალაძის თქმით, ბენზინგასამართი სადგურების მფლობელებს შესთავაზეს ადგილმონაცვლეობა და შეთანხმება მიღწეულია.
„გმირთა მოედნიდან სანაპიროს მიმართულებით ჩამსვლელი ავტოსატრანსპორტო კვანძი ერთ-ერთი პრობლემური ადგილია დღეს დედაქალაქში, ეს არის ლაგუნა ვერეს მიმდებარე ტერიტორია. აღნიშნულ პროექტზე ჩვენ გასულ წელსაც ვმუშაობდით, დავამუშავეთ სხვადასხვა პროექტი, გაკეთებული გვქონდა ვიდეო-მოდელირებაც, თუ როგორ შეიძლებოდა, აღნიშნულის მოწესრიგება. ბევრი მიმართულებით მიმდინარეობდა განხილვა, განიხილებოდა შუქნიშნის დამონტაჟება და ა.შ. თუმცა პრობლემა ვერ გვარდებოდა და საბოლოოდ დადგინდა, რომ საჭიროა დამატებითი სამანქანო ზოლის მოწყობა. პროექტზე ჩვენ რამდენიმე წლის წინაც ვმუშაობდით, თუმცა მაშინ ვერ მოხდა მოლაპარაკება ბენზინგასამართი სადგურების მფლობელებთან“, - განაცხადა კალაძემ.
თბილისის მერის თქმით, როგორც კი საკრებულო გადაწყვეტილებას დაამტკიცებს, პროექტის დამატებითი დეტალები საზოგადოებისთვის ცნობილი გახდება. კახა კალაძე მფლობელებს თანამშრომლობისთვის მადლობას უხდის.
„თბილისში, სხვადასხვა არეალში გამოვყოფთ მიწის ნაკვეთებს, რომ მესაკუთრეებმა ბენზინგასამართი სადგურების გადატანა შეძლონ. უახლოეს პერიოდში გაიგზავნება ეს საკითხი დედაქალაქის საკრებულოში გადაწყვეტილების მისაღებად და მონაცვლეობის შემდეგ, ბენზინგასამართი სადგურების დემონტაჟს დავიწყებთ. ამის შემდეგ კი კონკრეტული პროექტი განხორციელდება, რომელიც სატრანსპორტო ნაკადების გატარებას უზრუნველყოფს. ტრანსპორტისა და ურბანული განვითარების სააგენტო უკვე აქტიურად მუშაობს სატრანსპორტო კვანძის პროექტზე, რომელსაც მოსახლეობას გავაცნობთ. მადლობა მფლობელებს თანამშრომლობისთვის, შეთანხმება მიღწეულია, მოხდება ადგილმონაცვლეობა, განხორციელდება ბენზინგასამართი სადგურების დემონტაჟი და შესაბამისად, კონკრეტული პროექტი, რომელიც უზრუნველყოფს ნაკადების გატარებას“, - განაცხადა თბილისის მერმა.
