2025 წელს ქართული ღვინის საექსპორტო ფასის ზრდის ტენდენცია დაფიქსირდა, რაც ნიშნავს, რომ ქართული ღვინო თავს იმკვიდრებს პრემიალურ სეგმენტში, – ამის შესახებ ინფორმციას ღვინის ეროვნული სააგენტო ავრცელებს.
მათივე ცნობით, 2025 წელს, ქართული ღვინის ერთი ლიტრის საშუალო საექსპორტო ფასი, 2024 წელთან შედარებით, გაიზარდა და 2.98 აშშ დოლარს მიაღწია. 2024 წელს, აღნიშნული მაჩვენებელი 2.91 აშშ დოლარს შეადგენდა.
სტრატეგიულ ბაზრებზე, ერთი ლიტრი ქართული ღვინის საშუალო საექსპორტო ფასი ყველაზე მაღალია ამერიკის შეერთებულ შტატებში და 6,17 აშშ დოლარს შეადგენს, მას მოჰყვება იაპონია – 5,77 აშშ დოლარი, სამხრეთ კორეა – 5.26 აშშ დოლარი, დიდი ბრიტანეთი – 5.19 აშშ დოლარი, გერმანია – 4.73 აშშ დოლარი, ჩინეთი – 3.14 აშშ დოლარი და პოლონეთი – 2,5 აშშ დოლარი.
როგორც ღვინის ეროვნული სააგენტოს თავმჯდომარემ, ლევან მეხუზლამ განაცხადა, ღვინის ეროვნული სააგენტო აქტიურად მუშაობს, რომ კიდევ უფრო გაუმჯობესდეს ქართული ღვინის ხარისხი, რასაც შესაბამისად უნდა მოჰყვეს საშუალო საექსპორტო ფასის ზრდა.
„ქართული ღვინო, გლობალურ ბაზარზე არსებული მაღალი კონკურენციის პირობებში, აუცილებლად უნდა იყოს განსაკუთრებული, უმაღლესი ხარისხის, უნიკალური თვისებების მატარებელი. ამ ყველაფერზე ზრუნვა უნდა დავიწყოთ ვენახიდან და გავაგრძელოთ წარმოების პროცესში“, – განაცხადა ლევან მეხუზლამ.
