ეკონომიკის მინისტრის ნათია თურნავას განცხადებით, ეკონომიკის გახნის შემდგომი გეგმა დღეიდან გახსნილი ბიზნესაქტივობების პირველ პერიოდზე იქნება დამოკიდებული. ამის შესახებ მან კორონავირუსის პანდემიით გამოწვეული რთული ეპიდემიოლოგიური ვითარების შედეგად დაწესებული გარკვეული შეზღუდვების მოხსნის საკითხზე კომენტირებისას განაცხადა. ინფორმაციას ეკონომიკის სამინისტრო ავრცელებს.
„დღეიდან წერტილოვანი შეზღუდვების შემსუბუქების შემდგომი ეტაპი იწყება - მთელი საქართველოს მასშტაბით იხსნება მნიშვნელოვანი ბიზნესაქტივობები, პირველ რიგში, არასასურსათო ვაჭრობა, შოპინგ მოლები, მცირე და დიდი ქსელური მაღაზიები“, - აღნიშნა მინისტრმა.
მისი თქმით, აჭარაში კი, სადაც დადებითობის მაჩვენებელი დაბალია, სარესტორნე ინდუსტრია და კაფეები დღეიდან ღია სივრცეში გაიხსნებიან, ასევე, მუშაობას განაახლებს საქალაქთაშორისო ტრანსპორტი ყველა დიდ ქალაქში, გარდა თბილისის, რუსთავისა და ქუთაისისა.
„ყურადღებით დავაკვირდებით პროცესს, როგორ ჩაივლის ბიზნესაქტივობების გახსნის პირველი პერიოდი, რაზეც დამოკიდებულია, თუ რა წარმატებით წავა შემდგომი გახსნის გეგმა. როგორც იცით, რიგში დგანან ბაზრობები, რომლებიც მალე გაიხსნება. ასევე დანარჩენ დიდ ქალაქებში თბილისში, რუსთავსა და ქუთაისში სარესტორნე ინდუსტრია ელოდება გახსნას. დიდი იმედი მაქვს ბიზნესაქტივობის გახსნის პირველი ეტაპი წარმატებით ჩაივლის“, - აღნიშნა ნათია თურნავამ.
მინისტრმა საერთაშორისო რეგულარულ ფრენების აღდგენაზეც ისაუბრა. „შემსუბუქდა შემოყვანის რეჟიმი და როგორც იცით, შეზღუდვის გარეშე ვმასპინძლობთ ნებისიმერი ქვეყნიდან ჩამოსულ ვიზიტორს, ვისაც ვაქცინაციის ცნობა ექნება, ხოლო საკმაოდ ბევრი ქვეყნიდან ჩამოსულ ვიზიტორებს პისიარ ტესტით და მესამე დღეს ტესტირების ვალდებულებით შეეძლებათ შემოსვლა, რაც გვაძლევს საშუალებას, თანდათან მეტი ტურისტული ნაკადი მივიღოთ“, - აღნიშნა ნათია თურნავამ.
