მას შემდეგ, რაც Gucci-ს კრეატიულ დირექტორად დემნა გვასალია დაინიშნა, ბრენდის მფლობელი კომპანია Kering-ის საბაზრო ღირებულება $3 მილიარდით შემცირდა. პარიზის საფონდო ბირჟაზე კომპანიის აქციებმა 13%-იანი ვარდნა განიცადეს, რაც Kering-ისთვის თითქმის ერთი წლის განმავლობაში ანტირეკორდული შედეგია.
ქართველი დიზაინერი, დემნა გვასალია ამ დრომდე Balenciaga-ს ბრენდის ქვეშ ქუჩის სტილით შთაგონებული კოლექციებით იყო ცნობილი, რაც ერთდროულად ქებასა და სკეპტიციზმს იმსახურებდა. მოდის კრიტიკოსები დარწმუნებულები არ არიან, რამდენად შეეფერება დემნას ხედვა Gucci-ს ბრენდს, რომელიც ხანგრძლივ ისტორიასთან და მარადიულ ელეგანტურობასთანაა ასოცირებული, დემნას სტილი კი უფრო ავანგარდულია.
საქმე ისაა, რომ Gucci-ზე Kering-ის გაყიდვების თითქმის ნახევარი და საოპერაციო მოგების ⅔ მოდის. დემნას წინამორბედის, საბატო დე სარნოს მინიმალისტურმა ხედვამ არ გაამართლა და ბრენდის შემოსავალი 2024 წლის ბოლო კვარტალში 24%-ით შემცირდა. Gucci-ს გაყიდვების შემცირებამ Kering-ზე არსებითი გავლენა იქონია - კომპანიის აქციები წლიურად 40%-ით გაიაფდა.
დემნა Gucci-ის კრეატიული დირექტორის საქმიანობას 2025 წლის ივლისიდან შეუდგება, თუმცა, კონკრეტულად რა ხედვა აქვს ქართველ დიზაინერს იტალიური მოდის სახლისთვის - ეს სრულყოფილად ცნობილი, სავარაუდოდ, 2026 წლიდან გახდება.
