ჯანდაცვის მინისტრ ეკატერინე ტიკარაძის განცხადებით, GMP სტანდარტზე გადასვლა არ გადავადდება. ასე უპასუხა მან bm.ge-ს მიერ დასმულ შესაბამის კითხვას.
„GMP-ს სტანდარტი არ გადავადდება, ვინაიდან ეს სტანდარტები არის ჩვენი მოსახლეობის ჯანმრთელობისთვის ძალიან მნიშვნელოვანი. შემიძლია მოგაწოდოთ ყველა იმ დაწესებულების დასურათებული ვერსიები, რომლებიც ითხოვენ GMP-სტანდარტის გადავადებას. მე ვთვლი, რომ საქართველოში მსგავსი საწარმოების არსებობა სირცხვილია. დანაშაულია, რომ უფლებას ვაძლევთ და იქ წარმოებული მედიკამენტები იყიდება აფთიაქებში“, - განაცხადა ტიკარაძემ.
შეგახსენებთ: ფარმაცევტული სექტორის არაერთი თხოვნის მიუხედავად, ჯანდაცვის სამინისტრო პოზიციას არ ცვლის, რაც იმას ნიშნავს, რომ ცვლილებების ამოქმედება არ გადავადდება და 2022 წლის 1 იანვრიდან საქართველოში ფარმაცევტული პროდუქცია მხოლოდ GMP-ის საერთაშორისო სტანდარტის შესაბამისად უნდა იყოს წარმოებული.
