არ მგონია, რომ სანქციები მემუქრება - ამის შესახებ ბიზნესმენმა ირაკლი რუხაძემ მოსალოდნელ სანქციებზე რადიო “თასვისუფლებასთან“ ინტერვიუში განაცხადა.
ირაკლი რუხაძე ამბობს, რომ მას ამერიკა ვერ დაასანქცირებს, რადგან ამერიკის მოქალაქეა.
"მე ამერიკა ვერ დამასანქცირებს, იმიტომ, რომ სანქციის აზრი იკარგება და აგიხსნით, რატომ. სხვა ქვეყანას შეუძლია, დამასანქციროს, ამერიკას - ვერ, მე სადაც მოქალაქე ვარ, ის ქვეყანა ვერ დამასანქცირებს, - ამბობს რუხაძე რადიო “თასვისუფლებასთან“ ინტერვიუში.
სამთავრობო არხის მფლობელი უკრაინულ სანქციებზე საუბრობს და აცხადებს, რომ “უკრაინის სანქციები არ ადარდებს“.
"არ მგონია, რომ სანქციები მემუქრება, მართალი რომ გითხრათ, მაგრამ საერთოდ, ამ სიტუაციაში რომ ვართ და ამ ფორმაში, ეგ ძალიან არ მახარებს... მე დამასანქცირა უკრაინამ, რომელიც ძალიან მიყვარს, უზარმაზარი ბიზნესი მაქვს უკრაინაში აწყობილი და ვგიჟდები უკრაინაში სიარულზე, ყოველთვის მიყვარდა და წარმოუდგენელი ტრაგედია იყო ჩემთვის, როცა რუსეთი შეიჭრა უკრაინაში და როცა ჩემი მეგობრები მიგზავნიდნენ სურათებს, სახლის გვერდით ბომბები რომ იყო ჩამოყრილი... და მე რომ ეს ქვეყანა მასანქცირებს და ჩემს მეგობრებს ბოდიში უნდა ვუხადო, ეს ჩემთვის არის მძიმე. უამრავი აქეთ მიხდიდა ბოდიშს, სხვათაშორის, ჩემი უკრაინელი მეგობრები, იმიტომ, რომ ძალიან კარგად იციან, რა ხალხმა დამასანქცირა და რატომ... უკრაინის სანქციები, რა თქმა უნდა, არ მადარდებს, გარდა იმისა, რომ ადამიანურად მიყვარს ძალიან ის ქვეყანა, უკრაინის სანქცია არანაირად არ აისახება“, - ამბობს რუხაძე.
