27 დეკემბრიდან 15 იანვრის ჩათვლით, "ბაზარი ორბელიანის" სივრცე მცირე მეწარმეებს საკუთარი პროდუქციის გამოსაფენად დაეთმობა.
როგორც კომპანიაში განმარტავენ, თითქმის სამი კვირის განმავლობაში, "ბაზარი ორბელიანის" სტუმრებს ექნებათ შესაძლებლობა, გაეცნონ, დაათვალიერონ, შეისყიდონ და მხარი დაუჭირონ 100-ზე მეტ მეწარმეს საქართველოს სხვადასხვა წერტილიდან.
"ბაზარი ორბელიანი, სოციალური პასუხისმგებლობის ფარგლებში, მუდმივად გვერდში უდგას ადგილობრივ მცირე მეწარმეებს და სტარტაპერებს. მიმდინარე მოვლენების გათვალისწინებით, მცირე ბიზნესებს დღეს განსაკუთრებულად ესაჭიროებათ ჩვენი და საზოგადოების მხარდაჭერა.
ამ მიზნით, 27 დეკემბრიდან 15 იანვრის ჩათვლით, "ბაზარი ორბელიანის" სივრცე დაეთმობათ მცირე
მეწარმეებს, სადაც ნებისმიერ მსურველს ექნება შესაძლებლობა, მოინახულოს, შეიძინოს მათი
პროდუქტი, გაუზიაროს მხარდაჭერა და წაახალისოს მათი საქმიანობა", - ნათქვამია კომპანიის განცხადებაში.
"ბაზარი ორბელიანში" აღნიშნავენ, რომ პროექტი საერთაშორისო ორგანიზაციების მხარდაჭერით ხორციელდება, რაც მცირე ბიზნესების გაძლიერებას კიდევ უფრო უწყობს ხელს.
ორბელიანის მოედანზე "ბაზარი ორბელიანი" ისტორიული კოლმეურნეობის ბაზრის ტერიტორიაზე 2021 წელს გაიხსნა. წლის განმავლობაში ბაზრის 100-მდე წერტილში სხვადასხვა ტიპის სასურსათო და არასასურსათო პროდუქტი იყიდება, მეორე სართულის სივრცე კი კვების ობიექტებს აქვს დათმობილი.
