საქართველოს ფინანსთა სამინისტრო ქონების გადასახადის ესტონურ მოდელზე მუშაობს. ამის შესახებ BMG-ის ფინანსთა სამინისტროში განუცხადეს, მაგრამ უწყებაში არ აკონკრეტებენ, როდის იქნება მზად საკანონმდებლო ცვლილებები, რომელსაც „ქართული ოცნების“ მთავრობა მოიწონებს, შემდეგ კი, პარლამენტი განიხილავს და დაამტკიცებს.
ქონების გადასახადის ესტონური მოდელის ძირითადი არსი იმაში მდგომარეობს, რომ ესტონეთის მთავრობა მხოლოდ მიწის ღირებულებას ბეგრავს და არა უშუალოდ ამ მიწაზე არსებული შენობების ან სხვა ინვესტიციების ღირებულებას.
ფინანსთა სამინისტროში BMG-ის უთხრეს, რომ რეფორმის მიზანია, ქონების გადასახადის საუკეთესო საერთაშორისო პრაქტიკასთან დაახლოება, რაც უფრო მეტად უზრუნველყოფს ინვესტიციების სტიმულირებასა და ეკონომიკური ზრდის ხელშეწყობას.
„ფინანსთა სამინისტროში შემუშავებულია წინადადებები ქონების გადასახადის რეფორმასთან დაკავშირებით, მსგავსი მოდელი მოქმედებს ესტონეთში.
ამ დროისთვის, უკვე მომზადებულია აღნიშნული რეფორმის რეგულირების გავლენის შეფასების (RIA) ნაწილი.
ასევე, მზადდება გავლენის ანალიზი თითოეული მუნიციპალიტეტისა და ქონების გადამხდელი საწარმოების ჭრილში.
ანალიზის დასრულების შემდეგ, განხილული იქნება კანონპროექტის მომზადების მიზანშეწონილობის საკითხი და დადებითი გადაწყვეტილების შემდეგ, შესაბამისი საკანონმდებლო ცვლილებების პროექტი პარლამენტს წარედგინება რეფორმის პროექტის დასრულებისა და საჯარო განხილვების შემდეგ“, - ნათქვამია წერილობით პასუხში, რომელიც BMG-მ ფინანსთა სამინისტროდან მიიღო.
ქონების გადასახადის რეფორმირების საჭიროებაზე, კერძოდ, პირველ ეტაპზე, ფიზიკური პირებისთვის ქონების გადასახადის შემცირების და 40 000-ლარიანი ზღვრის 60 000 ლარამდე გაზრდის ინიციატივით, 2023 წელს, მე-10 მოწვევის პარლამენტში დეპუტატი რომან გოცირიძე გამოვიდა, მაგრამ „ქართულმა ოცნებამ“ მის საკანონმდებლო ინიციატივას იმ მიზეზით არ დაუჭირა მხარი, რომ ფინანსთა სამინისტრო მთლიანად ქონების გადასახადის რეფორმაზე მუშაობსო.
2024 წლის შემოდგომაზე, ფინანსთა მინისტრის პირველმა მოადგილემ გიორგი კაკაურიძემ BMG-ს განუცხადა, რომ ქონების გადასახადის ცვლილებების კანონპროექტზე მუშაობა გრძელდებოდა.
„ვინაიდან ქონების გადასახადი სრულად მუნიციპალური გადასახადია, ვაანალიზებთ, რა გავლენა ექნება თითოეულ მუნიციპალიტეტზე ამ ცვლილებას. ჩვენ უნდა გავაანალიზოთ კომპანიების დონეზე, ვის მოუწევს მეტის გადახდა, ვის ნაკლების, ასევე მუნიციპალიტეტების შემთხვევაში, ვისთვის რა დანაკლისი და რა მატება იქნება. ეს ანალიზი საკმაოდ დიდ დროს მოითხოვს და ვფიქრობთ, უახლოესი 2-3 თვის განმავლობაში მუშაობა დასრულდება. როდესაც შედეგები გვექნება, ამ შედეგების მიხედვით, ვიმსჯელებთ, შესაძლოა, საწყის ეტაპზე ნებაყოფლობითი იყოს ახალ სქემაზე გადასვლა, სამსჯელოა, როდის გადავალთ ქონების გადასახადის ახალ მოდელზე.
ცვლილებები ორივე მიმართულებითაა დაგეგმილი, როგორც კომპანიების, ასევე ფიზიკური პირების ნაწილში. რაც შეეხება ცვლილებების არსს, ძირითადად გადადის არა ქონების, არამედ მიწის ღირებულებაზე. რა მიწას იკავებს ესა თუ ის კომპანია. ესაა ეკონომიკისთვის უფრო სწორი გადასახადი. ვინაიდან, კომპანია რაც უფრო ნაკლებ მიწას დაიკავებს და უფრო ეფექტურად გამოიყენებს, უფრო მეტი შესაძლებლობა ეძლევა ჯამში ქვეყანას ეკონომიკური აქტივობა გააძლიეროს.
რაც შეეხება მოქალაქეებს, აქაც გადასახადი არ იქნება მხოლოდ შემოსავალზე დამოკიდებული, მათ შორის მიწაზე იქნება დამოკიდებული, სხვადასხვა კომბინაცია განიხილება“ - აცხადებდა გიორგი კაკაურიძე.
