PMCG კვლევითი ცენტრის დასაქმების თრექერის მიხედვით, 2025 წლის იანვარში, ადამიანების რაოდენობა, რომლებიც ხელფასს იღებდნენ გაიზარდა, 2024 წლის შესაბამის პერიოდთან შედარებით, 3.9%-ით, ხოლო 2023 წლის შესაბამის პერიოდთან შედარებით, 8.2%-ით და 880 277 შეადგინა. თუმცა, აღნიშნული მაჩვენებელი, 2024 წლის დეკემბერთან შედარებით, 10.4%-ით შემცირდა.
რაც შეეხება განაწილებას სახელფასო კატეგორიების მიხედვით, იანვარში, იმ ადამიანების რაოდენობა, რომლებიც იღებდნენ 600 ლარამდე ხელფასს, 19.5%-ს შეადგენდა, რაც 2024 წლის შესაბამის პერიოდთან შედარებით, 3.8 პროცენტული პუნქტით, ხოლო 2023 წლის შესაბამის პერიოდთან შედარებით, 7.1 პროცენტული პუნქტით შემცირებული მაჩვენებელია.
საპირისპიროდ, მზარდია 2 400 ლარის დე მეტი ხელფასის მქონეთა რაოდენობა. კერძოდ, გასულ თვეში იმ ადამიანების რაოდენობა, რომლებიც იღებდნენ 2 400 ლარს ან მეტ ხელფასს, 26.6%-ს შეადგენდა, რაც 2024 წლის შესაბამის პერიოდთან შედარებით, 4.8 პროცენტული პუნქტით, ხოლო 2023 წლის შესაბამის პერიოდთან შედარებით, 8.6 პროცენტული პუნქტით გაზრდილი მაჩვენებელია.
იმ ადამიანების რაოდენობა კი, რომლებიც იღებდნენ 9 600 ლარს ან მეტ ხელფასს, 2.3%-ს შეადგენდა, რაც 2024 წლის შესაბამის პერიოდთან შედარებით, 0.4 პროცენტული პუნქტით, ხოლო 2023 წლის შესაბამის პერიოდთან შედარებით, 0.8 პროცენტული პუნქტით მეტია.
ცნობისთვის, ბიზნესსექტორის ნაწილი აცხადებს, რომ ქვეყანაში ბოლო თვეების განმავლობაში შექმნილი არასტაბილურობა დასაქმების ბაზარზე ნეგატიურად უკვე აისახა. ეს განსაკუთრებით ჰორეკა სექტორს შეეხო. პოლიტიკური არასტაბილურობის და შემცირებული მოთხოვნის ფონზე, არაერთი ტურისტული ობიექტი დაიხურა, რის გამოც სტუმარმასპინძლობის სექტორში დასაქმებულების ნაწილმა სამსახური დაკარგა.
ამასთან, აღსანიშნავია საჯარო სექტორიდან გათავისუფლებები. ერთპარტიულმა პარლამენტმა "საჯარო სამსახურის შესახებ“ კანონში დაჩქარებული წესით მიიღო ცვლილებები. "რეორგანიზაციის" საბაბით კი უკვე მრავალი საჯარო მოხელე გაუშვეს, რომლებიც გადაწყვეტილების მიღმა პოლიტიკურ მოტივს ხედავენ. ტენდენცია მას შემდეგ დაიწყო, რაც 2024 წლის დეკემბრიდან, სხვადასხვა უწყებაში დასაქმებულმა საჯარო მოხელეებმა ხელი მოაწერეს საერთო განცხადებას, რომლითაც "ქართული ოცნების" EU-სთან მოლაპარაკებების გახსნის საკითხის დღის წესრიგიდან ამოღების გადაწყვეტილებას გაემიჯნენ.
