საქართველოს სტატისტიკის ეროვნული სამსახურის მიერ გამოქვეყნებული მონაცემების მიხედვით, 2024 წლის IV კვარტალში ქვეყანაში საშუალო თვიური ნომინალური ხელფასი 2 217.5 ლარს შეადგენდა, რაც წლიურ ჭრილში 8.5%-ით არის გაზრდილი. ეს თანხა წარმოადგენს მთლიან ხელფასს, რომელსაც საშემოსავლო გადასახადის 20% აკლდება, შესაბამისად ხელზე აღებული საშუალო მთლიანი ხელფასი 2024 წლის მეოთხე კვარტალში 1773 ლარს შეადგენდა. ანუ, საშუალო ხელფასს ყოველთვიურად საშუალოდ 443 ლარის საშემოსავლო გადასახადი აკლდება.
რეგიონების მიხედვით ყველაზე მაღალი საშუალო ხელფასები თბილისშია, რაც თვეში 2583 ლარს შეადგენს, ხოლო ყველაზე დაბალი რაჭა-ლეჩხუმსა და ქვემო სვანეთში 1060 ლარის ოდენობით.
სრულად რეგიონების მიხედვით, საშუალო ხელფასები ასე ნაწილდება:
თბილისი - 2583 ლარი;
სულ საქართველოს საშუალო - 2217.5 ლარი;
მცხეთა-მთიანეთი - 2087 ლარი;
ქვემო ქართლი - 1869 ლარი;
აჭარის ა.რ. - 1825 ლარი;
სამეგრელო-ზემო სვანეთი - 1489 ლარი;
სამცხე-ჯავახეთი - 1454 ლარი;
შიდა ქართლი - 1443 ლარი;
იმერეთი - 1442 ლარი;
კახეთი - 1441 ლარი;
გურია - 1304 ლარი;
რაჭა-ლეჩხუმი და ქვემო სვანეთი - 1060 ლარი.
რაც შეეხება სექტორების მიხედვით საშუალო ხელფასებს, მათ შორის პირველ ადგილს ინფორმაციისა და კომუნიკაციის სექტორი იკავებს, რომელიც IT სფეროსაც აერთიანებს. მეორე პოზიციაზეა საფინანსო სექტორი, მესამეზე კი მშენებლობის დარგი.
2024 წლის მეოთხე კვარტალში ყველაზე მაღალი საშუალო ხელფასი შემდეგ სექტორებში გაიცემოდა:
ინფორმაცია და კომუნიკაცია – 4 008.3 ლარი, თუმცა წინა წლის შესაბამის პერიოდთან შედარებით შემცირებულია 7.0 პროცენტით;
საფინანსო და სადაზღვევო საქმიანობები – 3 373.5 ლარი, გაიზარდა 8.5 პროცენტით;
მშენებლობა – 3 361.8 ლარი, გაიზარდა 9.8 პროცენტით;
პროფესიული, სამეცნიერო და ტექნიკური საქმიანობები – 3 259.1 ლარი, ზრდა 11.6 პროცენტით.
გენდერული სხვაობები ხელფასებში სქესის მიხედვით, 2024 წლის IV კვარტალში ქალების საშუალო თვიური ხელფასი 1 778.5 ლარს, ხოლო კაცების – 2 653.8 ლარს შეადგენდა. წლიური ზრდა ქალებისთვის 10.7 პროცენტი (171.2 ლარი), ხოლო კაცებისთვის 7.7 პროცენტი (189.9 ლარი) იყო. აღსანიშნავია, რომ საქმიანობის ყველა კატეგორიაში კაცების საშუალო ხელფასი ქალებისას აჭარბებს.
ბიზნეს სექტორი და საჯარო სექტორი ბიზნეს სექტორში დასაქმებულთა საშუალო ხელფასი 7.8 პროცენტით (170.8 ლარით) გაიზარდა და 2 367.0 ლარს მიაღწია. ამ სექტორში კვლავ მაღალი ანაზღაურებით გამოირჩეოდა "ინფორმაცია და კომუნიკაციის" სფერო (4 078.2 ლარი), თუმცა ამ კატეგორიაში 7.7-პროცენტიანი კლების ტენდენცია დაფიქსირდა.
არასამეწარმეო და საფინანსო სექტორში დასაქმებულთა საშუალო თვიური ხელფასი 10.7 პროცენტით (189.7 ლარით) გაიზარდა და 1 955.4 ლარი შეადგინა. ამ სფეროში ყველაზე მაღალი ხელფასი საფინანსო და სადაზღვევო სექტორში დასაქმებულებს ჰქონდათ.
