BUSINESS TIME

საინფორმაციო სააგენტო

ივლისში ტურიზმის შემოსავალი $336 მლნ-ით შემცირდება - TBC Research

25 ივნისს მიღებული გადაწყვეტილებით, საქართველოს მთავრობამ საერთაშორისო ტურიზმის სრული გახსნა ერთი თვით გადაავადა, შესაბამისად, ამ პერიოდის განმავლობაში ქვეყანაში რეგულარული საჰაერო რეისები არ შესრულდება. 2019 წლის ივლისში საქართველომ ტურიზმიდან რეკორდული მოცულობის - $395.4 მილიონი დოლარის შემოსავალი მიიღო. 2020 წლის ივლისში კი დახურული საზღვრების გათვალისწინებით, სექტორის შემოსავალი წლიურ ჭრილში 85%-90%-ით შემცირდება, რაც $336-356 მილიონი დოლარის შემცირებას ნიშნავს.
 
მსგავსი პროგნოზი აქვს TBC Research-საც, რომლის მიხედვითაც, ტურიზმის გახსნის გადავადებამდე ივლისში სექტორის შემოსავლების შემცირება წლიურად 70%-ზე იყო ნავარაუდევი, თუმცა გახსნის გადავადების შემდეგ შემცირების პროგნოზი 90%-მდე არის გაზრდილი.
 
2019 წელს საქართველომ საერთაშორისო ტურიზმიდან რეკორდული მოცულობის თანხა - $3.269 მილიარდი დოლარი მიიღო. TBC Research-ის მიერ ტურიზმის გახსნის გადავადებამდე გაკეთებული პროგნოზით, წელს სექტორის შემოსავლის 65%-ით, ანუ 2.124 მილიარდით შემცირება იყო ნავარაუდევი, თუმცა, საზღვრების გახსნის აგვისტომდე გადავადებით, სექტორის შემოსავალი წლიურ ჭრილში 75%-ით, ანუ $2.451 მილიარდი დოლარით შემცირდება.
 
მაისში საქართველოში სულ 36,358 საერთაშორისო ვიზიტორი იმყოფებოდა, რაც 2019 წელთან შედარებით 95%-ით ნაკლებია. სექტორის შემოსავალმა კი მხოლოდ $9.1 მილიონი დოლარი შეადგინა, რაც სებ-ის ინფორმაციით, წლიურ ჭრილში 97%-ით არის შემცირებული.
 
ბოლო 12 თვის განმავლობაში საქართველოს შემოსავალი საერთაშორისო ტურიზმიდან ასეთი იყო:
 
● 2019 მაისი - 270.4 მილიონი დოლარი;
● 2019 ივნისი - 340.0 მილიონი დოლარი;
● 2019 ივლისი - 395.4 მილიონი დოლარი;
● 2019 აგვისტო - 412.8 მილიონი დოლარი;
● 2019 სექტემბერი - 318.6 მილიონი დოლარი;
● 2019 ოქტომბერი - 266.9 მილიონი დოლარი;
● 2019 ნოემბერი - 201.7 მილიონი დოლარი;
● 2019 დეკემბერი - 217.2 მილიონი დოლარი;
● 2020 იანვარი - 193.4 მილიონი დოლარი;
● 2020 თებერვალი - 160.5 მილიონი დოლარი;
● 2020 მარტი - 73.8 მილიონი დოლარი;
● 2020 აპრილი - 8.5 მილიონი დოლარი;
● 2020 მაისი - 9.1 მილიონი დოლარი.
448